ភ្នំពេញ៖ កម្លាំងនគរបាលប៉ុស្តិ៍ស្រះចក ខណ្ឌដូនពេញដេញចាប់ និងបង្ក្រាបបានភ្លាមៗនូវមុខសញ្ញាឆក់ម្នាក់ បន្ទាប់ពីជនសង្ស័យរូបនេះ បានធ្វើសកម្មភាពឆក់ទ្រព្យសម្បត្តិរបស់ជនបរទេស ដែលកំពុងជិះម៉ូតូកង់បី កាលពីរសៀល ថ្ងៃទី៥ ខែកញ្ញា ឆ្នាំ២០១៤។
មន្ត្រីនគរបាលព្រហ្មទណ្ឌខណ្ឌដូនពេញ បានឲ្យដឹងថា ជនសង្ស័យដែលត្រូវបានកម្លាំង សមត្ថកិច្ចធ្វើការចាប់ខ្លួនមានឈ្មោះ កែវ រដ្ឋា អាយុ១៨ឆ្នាំ ស្នាក់នៅម្តុំបឹងកក់ សង្កាត់ស្រះចក ខណ្ឌដូនពេញ។ ជនសង្ស័យឈ្មោះ កែវ រដ្ឋា នេះត្រូវបានគេដឹងថា ទើបតែចេញពីពន្ធនាគារ ពីបទឆក់ប្រមាណជា២ខែមុនកន្លងមកនោះទេ។
មន្ត្រីនគរបាលបានបន្តថា នៅមុនពេលកើតហេតុមានជនបរទេសម្នាក់ ជិះម៉ូតូកង់បីមកដល់មុខផ្សាររាត្រី ស្រាប់តែលេចមុខជនសង្ស័យជិះម៉ូតូមួយគ្រឿង បានធ្វើកម្មភាពឆក់ ប៉ុន្តែភ្លាមៗនោះត្រូវបានជនរងគ្រោះស្រែក ធ្វើឲ្យមានការផ្អើលឆោរឡោរ ទើបកម្លាំងនគរបាលល្បាតនៅក្បែរនោះ ជួយអន្តរាគមទាន់ពេលវេលា ដោយឃាត់ខ្លួនជនសង្ស័យរូបនេះតែម្តង។
ក្រោយកើតហេតុជនសង្ស័យ រួមនិងម៉ូតូដែលជិះធ្វើសកម្មភាព ត្រូវបានសមត្ថកិច្ចបញ្ជូនទៅអធិការដ្ឋានខណ្ឌដូនពេញ ដើម្បីកសាងសំណុំរឿងបញ្ជូនទៅកាន់តុលាការ ដោះស្រាយតាមនីតិវិធីច្បាប់។
សូមបញ្ជាក់ថា ដោយសារតែមានបទល្មើស ឆក់ លួច ប្លន់ តែងតែកើតមាននោះ ស្នងការនគរបាលរាជធានីភ្នំពេញ លោកឧត្តមសេនីយ៍ ជួន សុវណ្ណ និងស្នងការរងទទួលផែនការព្រហ្មទណ្ឌលោកឧត្តមសេនីយ៍ ជួន ណារិន្ទ បានបញ្ជរឲ្យកម្លាំងជំនាញតាមការិយាល័យ និងកម្លាំងតាមបណ្តាខណ្ឌដាក់វេនចុះល្បាយជាបន្តបន្ទាប់ ដើម្បីជួយទប់ស្កាត់ទាន់ពេលវេលា ជាក់ស្តែងដូចជាករណីខាងលើនេះជាដើម៕
អត្ថបទដោយ៖ អ្នកប្រម៉ាញ់
ផ្តល់សិទ្ធដោយ ៖Khmer79
.jpg)
No comments:
Post a Comment