ភ្នំពេញ៖ បុរសម្នាក់ត្រូវគេប្រទះឃើញដេកស្លាប់ នៅក្នុងដីឡូត៍មួយកន្លែង ដោយឃើញមានស្នាមគ្រាប់កាំភ្លើង ទំនងជាត្រូវឃាតករបាញ់សម្លាប់ចំនួន២គ្រាប់ ដោយមួយគ្រាប់ចំថ្ពាល់ និងមួយគ្រាប់ទៀតចំខ្នង។ ហេតុការណ៍កើតឡើង កាលពីព្រឹកថ្ងៃទី០៦ ខែកញ្ញា ឆ្នាំ២០១៤ ចម្ងាយពីផ្លូវ៥៩៨ ប្រមាណ១០០ម៉ែត្រ នៅក្នុងតំបន់អភិវឌ្ឍន៍ប្ញស្សីកែវ ស្ថិតក្នុងភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌប្ញស្សីកែវ។
សមត្ថកិច្ចដែលចុះទៅពិនិត្យនៅកន្លែងកើតហេតុបានឲ្យដឹងថា ជនរងគ្រោះនៅមិនទាន់ស្គាល់អត្តសញ្ញាណនៅឡើយទេ ហើយក៏នៅមិនទាន់ដឹងថាត្រូវគេបាញ់សម្លាប់ពីពេលណា កន្លែងណាមកដែរ។
យោងតាមប្រភពព័ត៌មានពីមន្ត្រីអាវុធហត្ថលើផ្ទៃប្រទេសបានឲ្យដឹងថា ជនរងគ្រោះដែលត្រូវគេសម្លាប់ខាងលើ គឺជាមន្ត្រីអាវុធហត្ថនិងជាអ្នកបើករថយន្តឲ្យជនជាតិចិនផងដែរ។
ប៉ុន្តែបើតាមប្រភពពត៌មាននៅកន្លែងកើតហេតុបានឲ្យដឹងថា កាលពីម៉ោងជាង១០ យប់ថ្ងៃទី០៥ ខែកញ្ញា ឆ្នាំ២០១៤ មានរថយន្តមួយគ្រឿង មិនចាំម៉ាក បើកមកឈប់នៅក្នុងដីឡូត៍មួយសន្ទុះក៏បើកចេញបាត់ទៅ។
សមត្ថកិច្ចដែលចុះទៅពិនិត្យ នៅកន្លែងកើតហេតុបានឲ្យដឹងថា សពបុរសខាងលើ មិនទាន់ត្រូវបានគេស្គាល់ឈ្មោះនោះទេ ត្រូវឃាតករបាញ់សម្លាប់ចំនួន២គ្រាប់ ដោយមួយគ្រាប់ចំថ្ពាល់ និងមួយគ្រាប់ទៀតចំខ្នង។
សមត្ថកិច្ចបានសន្និដ្ឋានថា ជនរងគ្រោះដែលស្លាប់ ទំនងត្រូវឃាតករដឹកតាមរថយន្ត ពីចំណុចណាមួយរួចយកមកបាញ់សម្លាប់ចោល នៅចំណុចខាងលើ ព្រោះនៅកន្លែងកើតហេតុ សមត្ថកិច្ចបានឃើញមាន ស្នាមកង់រថយន្ត និងសំបកគ្រាប់កាំភ្លើងម៉ាកឡុកចំនួន២គ្រាប់ផងដែរ៕
អត្ថបទដោយ៖ អ្នកប្រម៉ាញ់ទីក្រុង
ផ្តល់សិទ្ធដោយ ៖Khmer79
.jpg)
No comments:
Post a Comment