ដោយសារតែភ័យស្លន់ស្លោរ កម្មកររោងចក្រអឹមវ៉េដួលសន្លប់ជាបន្តបន្ទាប់

កំពង់ឆ្នាំង៖ កម្មការនីរោងចក្រអឹម វ៉េ ខេត្តកំពង់ឆ្នាំង ១១នាក់បានដួលសន្លប់ជាបន្តបន្ទាប់ ក្រោយពេលដែលមានការផ្ទុះចរន្តអគ្គិសនីនៅក្នុងអគានៃរោងចក្រនេះ កាលពីវេលាម៉ោង១១និង២៥នាទី ថ្ងៃទី៥ ខែកញ្ញា ឆ្នាំ២០១៤ ស្ថិតនៅភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង។

រោងចក្រ អឹម វ៉េ ជារោងចក្រមួយដែលមាន កម្មករ កម្មការនី ប្រមាណជាង៣០០០នាក់ ធ្វើការនៅទីនោះ ហើយជានិច្ចកាលរោងចក្រមួយនេះតែងតែ មានកម្មករ កម្មការនី ដួលសន្លប់ជាញឹកញាប់ដោយសារតែបរិស្ថាននៅក្នុងបរិវេណក្នុងអគារ និងបាតុភាពផ្សេងៗមិនល្អប្រសើរ។

កម្មការនីម្នាក់ដែលទើបងើបពីដួលសន្លប់បានប្រាប់ឲ្យដឹងថា នៅមុនពេលមុនពេលកើតហេតុ នៅក្នុងអគារលេខ៥ មានផ្ទុះចរន្តអគ្គិសនីបង្កឲ្យមានការភ្ញាក់ផ្អើល ដែលជាហេតុធ្វើឲ្យកម្មការិនី ដែលកំពុងតែបម្រើការងារនៅទីនោះ មានការភ័យស្លន់ស្លោរឡើង នៅពេលនោះខាងបច្ចេកទេស អគ្គិសនីរោងចក្របានទៅបិទឌីសង់ទ័រ ហើយកម្មករបានធ្វើការជាធម្មតាវិញ ក្រោយមកបានភ្ជាប់ចរន្តអគ្គិសនីឡើងវិញ ក៏ផ្ទុះចរន្តអគ្គិសនីសារជាថ្មីទៀតបណ្តាលឲ្យ កម្មការនីដែលស្ថិតនៅទីនោះកាន់តែភ័យខ្លាំងឡើង ជាហេតុធ្វើឲ្យមានកម្មការនីបានដួលសន្លប់ជាបន្តបន្តាប់តែម្តង។ ក្រោយពីដួលសន្លប់ កម្មការនីទាំងនោះត្រូវបានបញ្ជូនមកសង្គ្រោះភ្លាមនៅមន្ទីរបង្អែកខេត្តកំពង់ឆ្នាំង៕

អត្ថបទដោយ៖ តាក្រញ៉ូង
ផ្តល់សិទ្ធដោយ ៖Khmer79

Ad unit

Side Ad