ឃាត់ខ្លួនមុខសញ្ញាចែកចាយគ្រឿងញៀនម្នាក់ ជាមួយនឹងថ្នាំញៀនជាច្រើន

ភ្នំពេញ៖ កម្លាំងអន្តរាគមន៍ខណ្ឌចំការមន កំពុងជិះល្បាតក៏ប្រទះឃើញជនសង្ស័យម្នាក់ ជិះម៉ូតូអត់ស្លាកលេខ ក៏ធ្វើការឃាត់ខ្លួនហើយឆែកឆេរក្នុងកែបម៉ូតូ ក៏ឃើញថ្នាំញៀនជាកញ្ចប់មួយចំនួនធំ។ ប្រតិបត្តិការណ៍នេះដឹកនាំដោយលោក ឡេង គឹមហៀង អធិការរងខណ្ឌចំការមន នឹងមានការបញ្ជាពីលោក យិន សាន អធិការខណ្ឌចំការមន បានដឹកនាំកម្លាំងចុះល្បាតតាមមូលដ្ឋាន បានអនុវត្ថន៍ឡើងនាវេលាម៉ោង ១នឹង៣០នាទីឈានចូលថ្ងៃទី០៥ ខែកញ្ញា ឆ្នាំ២០១៤ ស្ថិតនៅតាម បណ្តោយផ្លូវលេខ ៣១០ ត្រង់ស្ថានីយ៍ប្រេង Total ក្នុងសង្កាត់បឹងកេងកងទី១ ខណ្ឌចំការមន។

បើតាមលោកអធិការរង ឡេង គឹមហៀង បានឲ្យដឹងថា ក្រោមការបញ្ជារនឹងចង្អុលបង្ហាញពីថ្នាក់ស្នងការ នឹងលោកអធិការខណ្ឌ រូបលោកតែងតែដឹកនាំកម្លាំងល្បាតក្នុងមូលដ្ឋាននេះរៀងរាល់យប់ និងថ្ងៃ ដើម្បីការពារកុំឲ្យកើតមានអំពើឆក់-ប្លន់ លួច គាស់ផ្ទះ ផ្ទុយពីគោលនយោបាយភូមិសង្កាត់មានសុវត្ថិភាព។

លោកបន្តថា ខណៈកម្លាំងរបស់លោកបានឃើញបុរសម្នាក់ឈ្មោះ សុខ ពេជ្រ អាយុ២៥ឆ្នាំ ហើយជិះម៉ូតូសេ១២៥ ពណ៌ឈាមជ្រូក គ្មានស្លាកលេខមួយគ្រឿង កំពុងជិះតាមបណ្តោយផ្លូវលេខ៣១០ ក៏មានការសង្ស័យដូច្នេះកម្លាំងអន្តរាគមន៍បានដេញឃាត់ដើម្បីឆែកឆេរ តែបុរសម្នាក់នោះបានជិះរត់ រហូតដល់ស្ថានីយ៍ប្រេងតូតាល់ ក៏ចុះពីលើម៉ូតូរត់ចូលទៅម្តុំផ្លូវលូទឹកស្អុយផ្លូវលេខ ១០៥ ប៉ុន្តែត្រូវកម្លាំងអន្តរាគមន៍សហការណ៍ ជាមួយនគរបាលមូលដ្ឋានក៏ដេញចាប់ខ្លួនបានភ្លាមៗ ហើយឆែកឆេរមិនមានរកឃើញអ្វីទេនៅលើខ្លួន តែឆែកឆេរនៅក្នុងកែបម៉ូតូបានប្រទះឃើញថ្នាំញៀន ៣៩កញ្ចប់ និងឧបករណ៍ប្រើប្រាស់រួមជាមួយជញ្ជីងថ្លឹងថ្នាំញៀនលក់ផងដែរ។

ដោយឆែកឆេររកឃើញវត្ថុតាងជាក់ស្តែងបែបនេះ សមត្ថកិច្ចក៏សម្រេចនាំខ្លួន នឹងដកហូតម៉ូតូនឹងថ្នាំញៀន យកទៅកាន់អធិការដ្ឋាននគរបាលខណ្ឌចំការមន រង់ចាំបន្តការសាកសួរនឹងតាមចាប់ខ្លូនបក្ខពួកផ្សេងទៀត បញ្ជូនទៅសាលាដំបូងរាជធានីភ្នំពេញផ្តន្ទាទោសតាមផ្លូវច្បាប់។ សមត្ថកិច្ចដាក់ការសន្និដ្ឋានថា ជនសង្ស័យម្នាក់ដែលឃាត់ខ្លួននេះ ទំនងជាមេក្លោងក្នុងការជួញដូរគ្រឿងញៀនយ៉ាងសកម្ម ក្នុងរាជធានីភ្នំពេញ ព្រោះដោយសារតាមចំនួនថ្នាំដែលឆែកឃើញមានចំនួនច្រើនលើសការស្មាន៕

អត្ថបទដោយ៖ បិសាចរាត្រី

ផ្តល់សិទ្ធដោយ ៖Khmer79

Ad unit

Side Ad