ព្រឹត្តិការណ៍ចំនួន២ដាច់ដោយឡែកពីគ្នា នឹងធ្វើការប្រកួតបញ្ចប់វគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ នៅថ្ងៃសៅរ៍ និងថ្ងៃអាទិត្យ ចុងសប្តាហ៍នេះ ហើយពានរង្វាន់ទាំង២នេះបានបង្កើតឡើង សម្រាប់ឲ្យតែបុគ្គលិក និងសិស្សនិស្សិតរបស់ខ្លួនឲ្យចូលលេងដូចគ្នា គឺមិនទាន់បានបើកទូលាយសម្រាប់ក្រុមផ្សេងៗនោះឡើយ។
សម្រាប់ព្រឹត្តិការណ៍ទី១ គឺការប្រកួតកីឡាហ្វុតសាលយុវជនដណ្តើមពានខេមអេដ ប្រចាំឆ្នាំ២០១៤ ដែលរៀបចំឡើងដោយវិទ្យាស្ថានខេមអេដ ហើយការប្រកួតនេះបានរកឃើញក្រុមខ្លាំងទាំង២ត្រូវឡើងទៅជួបគ្នានៅវគ្គផ្តាច់ព្រ័ត្រហើយ គឺក្រុម Knight FC និង The Crown FC។
ការទទួលបានឱកាសឡើងទៅវគ្គផ្តាច់ព្រ័ត្ររបស់ក្រុមទាំង២ បានកើតមានឡើងបន្ទាប់ពីក្រុមទាំង២បានទម្លាក់ក្រុម The Blue FC និងក្រុម The Bdude ក្នុងការប្រកួតវគ្គពាក់កណ្តាលផ្តាច់ព្រ័ត្រ កាលពីថ្ងៃសៅរ៍ និងថ្ងៃអាទិត្យ កន្លងមកនេះ ដោយក្នុងនោះ ក្រុម Knigth FC បានទម្លាក់ក្រុម The Blue FC ជាមួយការឈ្នះក្នុងការប្រកួតទាំង២ជើងគឺ ៣-២ និង ២-១។ ចំណែកក្រុម The Crown FC បានទម្លាក់ក្រុម The Bdude តាមរយៈការឈ្នះ ២-០ ក្នុងការប្រកួតទាំង២លើកដូចៗគ្នា។
យ៉ាងណាមិញ សម្រាប់ការប្រកួតផ្តាច់ព្រ័ត្ររវាង Knight FC និង The Crown FC នឹងត្រូវធ្វើឡើងនៅលើទីលានសិប្បនិម្មិត KB ក្រោយទូតអូស្ត្រាលី នៅព្រឹកថ្ងៃសៅរ៍នេះ វេលាម៉ោង ៨:០០ ដល់ម៉ោង ៩:០០ គឺបន្ទាប់ពីការប្រកួតដណ្តើមយកចំណាត់ថ្នាក់លេខ៣រវាងក្រុម The Bdude និងក្រុម The Blue FC។
ចំពោះព្រឹត្តិការណ៍ទី២ គឺការប្រកួតកីឡាបាល់ទាត់ ACLEDA-JOHN BRINSDEN Cup 2014 ដែលរៀបចំឡើងដោយធនាគារអេស៊ីលីដា ហើយការប្រកួតនេះបានរកឃើញក្រុមទាំង៤ ដែលត្រូវឡើងមកប្រកួតនៅវគ្គពាក់កណ្តាលផ្តាច់ព្រ័ត្រហើយ ខណៈការប្រកួតវគ្គនេះ នឹងត្រូវធ្វើឡើងនៅចុងសប្តាហ៍នេះ។
នៅថ្ងៃសៅរ៍នេះ គឺជាការប្រកួតរវាងក្រុមការិយាល័យកណ្តាល(ឃ) និងក្រុមសាខាស្រុកបារាយណ៍ ដែលនឹងត្រូវធ្វើឡើងនៅទីលានស្តាតចាស់ ចាប់ពីម៉ោង២រសៀលតទៅ។ ចំណែកក្រុមសាខាស្រុកស្រីសន្ធរ នឹងត្រូវធ្វើការប្រកួតវគ្គពាក់កណ្តាលផ្តាច់ព្រ័ត្រ នៅស្តាតចាស់ដដែល ប៉ុន្តែនៅថ្ងៃអាទិត្យបន្ទាប់ វេលាម៉ោង ២រសៀល៕
ផ្តល់សិទ្ធដោយ ៖Khmer79
.jpg)
No comments:
Post a Comment