Costa នឹងត្រូវអវត្តមានក្នុងពេលអេស្ប៉ាញជួបម៉ាសេដ្វានដោយសារបួសសរសៃពួរគន្លាក់ជើង

ខ្សែប្រយុទ្ធ Diego Costa របស់ក្លិប Chelsea ត្រូវបានលុបឈ្មោះចេញពីក្រុមបាល់ទាត់ជម្រើសជាតិអេស្ប៉ាញដែលនឹងត្រូវជួបជាមួយនឹងក្រុមជម្រើសជាតិម៉ាសេដ្វានក្នុងការប្រកួតជម្រុះបើកឆាកសម្រាប់យុទ្ធនាការ Euro ឆ្នាំ២០១៦ របស់ពួកគេនៅថ្ងៃចន្ទខាងមុខនេះដោយសាតែបញ្ហារបួសសរសៃពួរគន្លាក់ជើង។ កីឡាករវ័យ២៥ឆ្នាំរូនេះបានលេងត្រឹមតែរយៈពេលមួយម៉ោងគត់ក្នុងពេលក្រុមម្ចាស់ជើងឯកប្រចាំទ្វីបអឺរ៉ុបមួយនេះបានទទួលរងបរាជ័យ ១-០ ក្រោមស្នាដៃក្រុមបាល់ទាត់ជម្រើសជាតិបារាំងក្នុងការប្រកួតមិត្តភាពកាលពីថ្ងៃព្រហស្បតិ៍ ហើយនិងត្រូវជំនួសក្នុងក្រុមនេះដោយខ្សែប្រយុទ្ធ Munir El Haddadi វ័យ១៨ឆ្នាំ របស់ក្លិប Barcelona។

សេចក្តីថ្លែងការណ៍មួយនៅលើគេហទំព័ររបស់ក្រុមបាល់ទាត់ជម្រើសជាតិអេស្ប៉ាញ បានឲ្យដឹងថា៖ «Diego Costa បានចាកចេញពីមូលដ្ឋានហ្វឹកហាត់របស់អេស្ប៉ាញកាលពីព្រឹកនេះដោយសាតែបញ្ហារបួសសរសៃពួរគន្លាក់ជើងទៅលើជើងឆ្វេងរបស់គេ។ ការរងរបួសនេះត្រូវបានពិនិត្យឃើញដោយម៉ាស៊ីនស្កែនកាលពីរសៀលនេះ ក្រោយពីកីឡាកររូបនេះបានត្អូញត្អែរពីការឈឺចុកចាប់ ក្រោយពីលេងជាមួយនឹងក្រុមជម្រើសជាតិបារាំងកាលពីថ្ងៃព្រហស្បតិ៍»។ ការរងរបួសរបស់ Costa នឹងធ្វើឲ្យលោក Vicente del Bosque គ្រូបង្វឹកនៃក្រុមបាល់ទាត់ជម្រើសជាតិអេស្ប៉ាញ មានជម្រើសកាន់តែតិចក្នុងតំបន់ប្រយុទ្ធ ខណៈដែលកីឡាករគ្មានបទពិសោធ Paco Alcacer គឺជាខ្សែប្រយុទ្ធតែម្នាក់ក្នុងក្រុមរបស់លោក។

ដោយឡែក Munir បានធ្វើការបង្ហាញខ្លួនជាលើកទី១របស់គេសម្រាប់ក្រុម Barcelona កាលពីពីរសប្តាហ៍កន្លងទៅ ខណៈដែលរូបគេបានស៊ុតបាល់បញ្ចូលទី១គ្រាប់ក្នុងពេលក្រុមរបស់គេទទួលជ័យជម្នះ ៣-០ លើក្រុម Elche ហើយរូបគេក៏បានជួយឲ្យក្រុមជម្រើសជាតិអេស្ប៉ាញអាយុក្រោម២១ឆ្នាំទទួលជ័យជម្នះ ១-០ លើក្រុមជម្រើសជាតិហុងគ្រីកាលពីថ្ងៃព្រហស្បតិ៍ ផងដែរ៕
ផ្តល់សិទ្ធដោយ ៖Khmer79

Ad unit

Side Ad